helpline khabar

ट्रम्पको धम्कीपछि इरानले पनि अमेरिकालाई दियो चेतावनी

6 दिन अगाडी

News by: helpline

Shares: 6

एजेन्सी । अमेरिका र इरानबिचको तनाव उत्कर्षमा पुगेसँगै अमेरिकी राष्ट्रपति डोनाल्ड ट्रम्पले इरानमाथि कठोर हमलाको चेतावनी दिनुभएको छ ।

स्ट्रेट अफ हर्मोज पूर्ण रूपमा खुला गर्नका लागि आफूले दिएको समयसीमा सकिनै लाग्दा ट्रम्पले इरानलाई सम्बोधन गर्दै ’आज रात एउटा सिङ्गो सभ्यताको अन्त्य हुने’ धम्की दिनुभएको हो । ट्रम्पको यो अभिव्यक्तिले मध्यपूर्वमा ठुलो युद्धको सङ्केत गरेको छ । अमेरिकाले इरानको रणनीतिक जलमार्गमा लगाएको अवरोध हटाउन केही घण्टाको मात्र समय बाँकी रहेको उल्लेख गर्दै उक्त चेतावनी दिएको अलजजिराले लेखेको छ । सामाजिक सञ्जालमार्फत आफ्नो धारणा सार्वजनिक गर्दै ट्रम्पले इरानको ४७ वर्ष लामो ’भ्रष्टाचार र शोषण’ को इतिहास आज रातिबाट समाप्त हुने दाबी गर्नुभएको हो ।

ट्रम्पले लेख्नुभएको छ, “आज राति एउटा सिङ्गो सभ्यताको अन्त्य हुनेछ, जुन फेरि कहिल्यै फर्किएर आउने छैन । म यस्तो होस् भन्ने त चाहन्नँ, तर सम्भवतः यो हुनेछ ।” उहाँले इरानमा अब फरक, चलाख र कम कट्टरपन्थी सोच भएका व्यक्तिहरूको उदय हुने विश्वास व्यक्त गर्नुभएको छ ।

यसैबीच ट्रम्पको चेतावनीको जवाफ फर्काउँदै इरानकोे इस्लामिक रिभोलुसनरी गार्ड कोर (आईआरजीसी) ले कडा प्रतिक्रिया जनाएको छ । आईआरजीसीले सरकारी सञ्चारमाध्यममार्फत जारी गरेको संयुक्त वक्तव्यमा अमेरिका र यसका क्षेत्रीय सहयोगीहरूविरुद्ध अहिलेसम्म निकै संयम देखाएको र बदला लिन लक्ष्य छनोटमा सावधानी अपनाएको बताएको छ । अमेरिकालाई चेतावनी दिँदै आईआरजीसीले अमेरिकी सेनाले आफ्नो सीमा नाघे उनीहरूको प्रतिक्रिया यस क्षेत्रभन्दा पनि बाहिरसम्म पुग्ने चेतावनी दिएको छ । अमेरिका र यसका सहयोगीहरूको पूर्वाधारलाई निशाना बनाउने र वर्षौंसम्म तेल ग्यासको आपूर्ति अवरुद्ध गर्न सक्ने उनीहरूले स्पष्ट पारेका छन् ।