helpline khabar

टोल–टोलमा सुरक्षा समिति बनाउन एमाले अध्यक्ष ओलीको अनुरोध,देशमा असुरक्षा रहेको टिप्पणी,सरकार र जेनजीबीचको संझौता नमान्ने

5 दिन अगाडी

News by: helpline

Shares: 10

काठमाडौं । नेकपा एमालेका अध्यक्ष केपी शर्मा ओलीले टोल–टोलमा सुरक्षा समिति बनाएर सुरक्षा गर्न एमाले लगायत अन्य दलका कार्यकर्तामा अनुरोध गर्नु भएको छ ।

११ औं महाधिवेशन मार्फत तेस्रो कार्यकालका लागि निर्वाचित एमाले अध्यक्ष ओलीले महाधिवेशन समापन मन्तब्य दिदैं टोल–टोलमा सुरक्षा समिति बनाएर सुरक्षा गर्न अनुरोध गर्नुभएको हो ।

उहाँले सरकारको मात्रै भर पर्दा धोका पाउन सकिने भन्दै एक हप्ताभित्र देशभर टोल–टोलमा सुरक्षा समिति बनाउन निर्देशन दिनुभयो ।

अध्यक्ष ओलीले आफ्नै खुट्टामा उभिएर आफ्नै सुरक्षा गर्नुपर्ने भन्दै अहिले देशमा असुरक्षा रहेको उल्लेख गर्नुभयो । उहाँले एमाले र अन्य पार्टीहरूलाई अनुरोध गर्दै भन्नुभयो , ‘टोल–टोलमा सुरक्षा समिति अविलम्ब बनाउनुहोस्। एक हप्ताभित्र।’

ओलीले अहिले देशमा अराजकता मच्चाउन खोजिएको र एमालेले त्यसलाई रोक्ने दाबी समेत गर्नुभयो । देशमा कसैले शान्तिको अनुभूति गर्न नपाइरहेको बताउँदै शान्तिको अनुभूति गराउने काम आफ्नै सुरक्षा प्रबन्धबाट मात्रै हुने तर्क ओलीको छ ।

ओलीले मन्तब्यमा भन्नुभयो– ’एमाले नेतृत्वमाथि मिडिया ट्रायल भइरहेको छ। अहिलेसम्म मिडिया प्रचार भयो, अब भौतिक हमला हुनसक्छ। पञ्चायतकालमा जस्तै जालसाजीका मुद्दामामिला चलाइन सक्छ,’।

ओलीले सरकार र जेनजीबीच भएको सम्झौता अवैधानिक रहेको भन्दै यो सम्झौता एमालेले कार्यान्वयन हुनै नदिने उल्लेख गर्नुभयो ।

ओलीले भन्नुभयो, ‘यो सरकारसँग संविधानलाई चलाउने कुनै अधिकार छैन । सरकार र जेनजीबीचको सम्झौता लागू हुन सक्दैन । एमालेले लागू हुन दिँदैन । कि चुनावको तयारी गर, नत्र बाटो लाग्दा हुन्छ ।’