काठमाडौं । पूर्वराष्ट्रपति डा रामवरण यादवले हालैको प्रतिनिधिसभा सदस्य निर्वाचनबाट प्राप्त दुई तिहाइ नजिकको जनमतलाई राष्ट्रिय स्वतन्त्र पार्टीले गणतन्त्र, संविधान र सङ्घीयता जोगाउँदै देश बनाउने काममा उपयोग गर्न सक्नुपर्ने बताउनुभएको छ ।

नेपाल पत्रकार महासङ्घका पूर्वअध्यक्ष विपुल पोखरेलद्वारा लिखित ‘सङ्कल्पन’ पुस्तकको बिमोचन गर्नुहुदै पुर्बराष्ट्रपति यादवले जेनजी युवाहरूको आन्दोलन, पछिको परिवर्तन र निर्वाचनको परिणामलाई सबैले स्वीकार गर्नुपर्ने बताउनुभयो। पुर्ब राष्ट्रपति यादवले रास्वपाले प्राप्त जनमतलाई देश बनाउन सदुपयोग गर्नुपर्ने पनि बताउनुभयो । पूर्वराष्ट्रपति डा यादवले विसं २०१५ मा नेपाली काँग्रेसले दुई तिहाइ मत ल्याएर विपी कोइराला प्रधानमन्त्री हुनुभएको स्मरण गर्नुहुदै त्यसले पूरा समय काम गर्न नपाएको बताउनुभयो ।

उहाँले हालको जनमत त्यसरी खेर नजाओस् भन्नुहुदै, देश, संविधान, लोकतन्त्र, सङ्घीयता, धर्म निरपेक्षता र, समावेशीता सबै जोगाउनु पर्नेमा जोड़ दिनुभयो । संविधानको अक्षरसः पालना हुनुपर्ने भन्नुहुदै पुर्बराष्ट्रपति यादवले आगामी निर्वाचनमा प्रतिपक्ष नरहने गरी आफू मात्रै जित्नुपर्छ भन्ने सोच कसैले पनि राख्न नहुने पनि बताउनुभयो । उहाँले प्रतिपक्ष बिना लोकतान्त्रिक प्रणाली बलियो हुनै नसक्ने स्पस्ट पार्नुभयो । कार्यक्रममा नेपाली कांग्रेसका नेता डा मिनेन्द्र रिजालले गत फागुन २१ गते सम्पन्न प्रतिनिधिसभाको निर्वाचनमा बहुमत प्राप्त पार्टीले देशको निर्माणको नेतृत्व लिनुपर्ने र त्यसमा अरु सबै पार्टी र नागरिकले आ–आफ्नो जिम्मेवारी बहन गर्नुपर्नेमा जोड दिनुभयो ।

 मुलुकमा विसं २०७४ यता ‘कारोबारी राजनीति’ र गठबन्धनको संस्कार चलिरहेकामा पछिल्लो जनमतले त्यसमा ‘ब्रेक’ लगाएको उल्लेख गर्दै उहाँले अब विगतका गल्ती नदोहोरिने ग़री मुलुक अगाडि बढ्नुपर्ने धारणा ब्यक्त गर्नुभयो ।

कांग्रेस नेता डा रिजालले लोकतान्त्रिक व्यवस्थामा सूचना प्रविधिलाई गलत मनसाय राखेर नियमन गर्ने वा प्रतिपक्षविनाको राजनीतिक प्रणालीको कल्पना गरिनु उचित नहुने बताउनुभयो । राससका कार्यकारी अध्यक्ष धर्मेन्द्र झाले लोकतन्त्रमा जिम्मेवारीमा रहेका सबै थप जिम्मेवार हुनुपर्नेमा जोड दिँदै जनताले अनुभूत हुने गरी लोकतन्त्रलाई आत्मसात गर्नुपर्ने बताउनुभयो । उहाँले पाखरेलद्वारा लिखित पुस्तकले अखबारी लेखनले पनि विचार निर्माण गर्न सक्छ र कृति बन्नसक्छ भन्ने दृष्टान्त प्रस्तुत गर्न सफल भएको पनि बताउनुभयो ।

वरिष्ठ पत्रकार बबिता बस्नेतले ‘सङ्कल्पन पुस्तक लेखहरूको सङ्ग्रह मात्रै नभएर तत्कालीन समयको दस्तावेज भएको टिप्पणी गर्दै युवाहरूको भावना र लोकतन्त्रको सबलीकरणबारे लेखकले दूरदृष्टि प्रस्तुत गरेको बताउनुभयो । 

लेखक पोखरेलले समकालीन राजनीति, समाज, लोकतन्त्र, विचार र पत्रकारिताका विषयमा आफूले देखेका समय र सन्दर्भलाई सङ्कलन गरेर पुस्तकका रूपमा ल्याएको बताउनुभयो । पुस्तकको प्रकाशन गोरक्ष राष्ट्रिय दैनिकले गरेको हो ।