helpline khabar

पूर्व गृहमन्त्री रमेश लेखक पनि रिहा

4 दिन अगाडी

News by: helpline

Shares: 7

काठमाडौं । प्रहरी हिरासतमा रहनु भएका पूर्वगृहमन्त्री रमेश लेखक रिहा हुनु भएको छ ।

हिरासतमा रहनु भएका लेखकलाई स्वास्थ्य परीक्षणपश्चात छाडिएको जिल्ला प्रहरी परिसर काठमाडौंले जनाएको छ । लेखकलाई परिवारको जिम्मा लगाइएको जिल्ला प्रहरीले जनाएको छ । प्रहरी परिसर काठमाडौंले सर्वोच्च अदालतको आदेश अनुसार लेखकलाई रिहा गरेको हो ।

जेन्जी आन्दोलन घटना छानबिनका लागि गठित गौरीबहादुर कार्की नेतृत्वको जाँचबुझ आयोगको प्रतिवेदनका आधारमा पूर्व गृहमन्त्री रमेश लेखकलाई यहि चैत १४ गते प्रहरीले पक्राउ गरेको थियो । गत भदौ २३ र २४ गतेको जेनजी–आन्दोलनमा लापरबाही गरेर युवाहरूको ज्यान गुमेको भन्दै पूर्व प्रधानमन्त्री एवं नेकपा एमालेका अध्यक्ष केपी शर्मा ओली र लेखकलाई आयोगले दोषी देखाएको थियो।

प्रतिवेदनका आधारमा ज्यानसम्बन्धी कसुरमा उहाँहरुलाई पक्राउ गरिएको थियो । सर्वोच्चले ओली र लेखकलाई मुद्दा दायर गर्न वा चैत २६ गतेसम्ममा रिहा गर्न आदेश दिएको थियो । सर्वोच्चले चैत २३ गते ओली र लेखकको मुद्धा चैत २६ गतेसम्ममा टुंग्याएर रिहा गर्न आदेश दिएको थियो । लेखक १३ दिन हिरासतमा रहेर छुट्नु भएको हो ।

उहाँसँगै पक्राउ पर्नु भएका पूर्वप्रधानमन्त्री ओलीलाई त्रिबि अस्पतालमै प्रहरीले परिवारको जिम्मामा केहीबेर अघि छाडिसकेको छ ।