helpline khabar

प्रतिनिधिसभा विघटनविरुद्धको रिटमा अन्तरिम आदेश भएन, ७ दिनभित्र जवाफ पेश गर्न आदेश

1 महिना अगाडी

News by: helpline

Shares: 0

काठमाडौं । प्रतिनिधिसभा विघटनविरुद्ध परेको रिटमा सर्वोच्च अदालतले अन्तरिम आदेश जारी गर्न अस्वीकार गरेको छ ।

आज भएको सुनवाइपश्चात सर्वोच्चको संवैधानिक इजलासले बिपक्षीका नाममा कारण देखाऊ आदेश मात्रै जारी गरेको छ । विघटनविरुद्ध १६ वटा रिट निवेदन परेका थिए । सबैमा एकै आदेश जारी भएको छ । आदेशमा भनिएको छ, ‘निवेदकको माग बमोजिमको आदेश किन जारी नपर्ने हो कानून बमोजिमको आधार र कारण खुलाइ यो आदेश प्राप्त भएको मितिले ७ दिनभित्र महान्यायाधीवक्ताको कार्यालयमार्फत लिखित जवाफ पेश गर्नु ।’

सर्वोच्चको संवैधानिक इजलसले प्रधानमन्त्री सुशीला कार्कीको नेतृत्वमा सरकार गठन र संसद् विघटनविरुद्धको मुद्दामा अन्तरिम आदेश दिन अस्वीकार गरेको हो । सर्वाेच्चले राष्ट्रपतिको कार्यालय, प्रधानमन्त्रीको कार्यालय लगायतका विपक्षीलाई सरकार गठन र प्रतिनिधिसभा विघटनका मुद्दामा ७ दिनभित्र लिखित जवाफ पेस गर्न पनि संवैधानिक इजलासले आदेश जारी गरेको हो ।

संवैधानिक इजलासले सरकार गठन र प्रतिनिधिसभा विघटनविरुद्धका मुद्दामा बुधबार पहिलो सुनुवाइ गरेको हो ।