helpline khabar

अविरल वर्षाले देशभर बिभिन्न सडक अवरुद्ध, जनजीवन प्रभावित,डुबानको जोखिम

3 हप्ता अगाडी

News by: helpline

Shares: 15

काठमाडौं । निरन्तर वर्षासँगै देशभर बाढी, पहिरो, सडक भासिने र खोला तथा नदी आसपासमा डुबानको जोखिम बढेको छ ।

वर्षाका कारण पृथ्वी, बिपी, सिद्धिचरण, मध्यपहाडी, कालीगण्डकी, तमोर, राप्ती र कर्णालीलगायत प्रमुख राजमार्गका विभिन्न खण्ड अवरुद्ध हुँदा सडक यातायात प्रभावित भएको छ भने नदी तथा खोलामा जलसतह बढेपछि तटीय र होचा भूभागमा जोखिम बढेको छ । वर्षका कारण जनजीवन समेत प्रभावित बनेको छ । राष्ट्रिय विपत् जोखिम न्यूनीकरण तथा व्यवस्थापन प्राधिकरणका अनुसार पृथ्वी राजमार्गको कृष्णभिर, चौकीभिर, जवाङ खोला र फिस्लिङ क्षेत्रमा यातायात प्रभावित बनेको छ । ती स्थानमा पहिरो पन्छाएर सडक खुलाउने प्रयास भइरहेको भए पनि वर्षा नरोकिएकाले सडक पुनः अवरुद्ध हुने जोखिम कायमै छ ।

कालीगण्डकी नदीमा आएको बाढीले मिर्मी ड्याम साइटभन्दा तल रहेको स्याङ्जाको मिर्मी र गुल्मीको हर्मिचौर जोड्ने पुल बगाएको छ । त्यसैगरी भारी वर्षापछि तिनाउ नदीमा आएको बाढीले दुई वटा घर बगाएको छ भने तीन वटा घरमा क्षति पुर्‍याएकोछ ।

गए राति आएको बाढीले बुटवल उपमहानगरपालिका–११ टप मजुवाका दुर्गा बानियाँ र उनको छिमेकीको घर बगाएको हो । अविरल वर्षाका कारण हेटौँडालाई काठमाडौँ जोड्ने अधिकांश सडक सञ्जाल अवरुद्ध भएका छन् । विषेशगरी मधेसलाई राजधानीसँग जोड्ने हेटौँडाका अधिकांश सडक खण्डहरू पहिरोका कारण अवरुद्ध भएका हुन् ।

नारायणी नदी र यसका सहायक नदीहरूमा जलसतह खतराको तहभन्दा माथि पुगेपछि तटीय क्षेत्रमा बाढी र डुबानको उच्च जोखिम सिर्जना भएको छ । जल तथा ऊर्जा आयोगको सचिवालय, जल विज्ञान तथा जलस्रोत अनुसन्धान केन्द्रको बाढी पूर्वानुमान महाशाखाले विशेष बुलेटिन जारी गर्दै सतर्कता अपनाउन आग्रह गरेको छ।