काठमाडौ – नेपाल कम्युनिष्ट पार्टी (एमाले)का अध्यक्ष केपी शर्मा ओलीले उहाँले देश बनाउन युवाको ऊर्जा र अनुभवी पुस्ताको दृष्टि चाहिने बताउनुभएको छ ।

पार्टीको चुनावी घोषणा पत्र सार्वजनिक कार्यक्रममा आज उहाँले आगामी निर्वाचन राष्ट्रघात र स्वाभिमानबीचको संघर्ष भएको बताउनुभयो । उहाँले भन्नुभयो, “आगो र उज्यालो दुवै मिलेर मात्र यो देशको भविष्य उज्ज्वल हुन्छ । हाम्रो राजनीति सबै पुस्तालाई जोड्ने, मिलाउने, साथ लिएर हिँड्ने हो ।” अध्यक्ष ओलीले घोषणा पत्रमा तत्काल गर्ने ११ काम, ५ आधारभूत घोषणा, र समृद्धिका २५ स्तम्भलाई नीतिगत प्राथमिकतामा राखेको उल्लेख गर्नुभयो । “निर्वाचनपछि बन्ने सरकारको पहिलो मन्त्रीपरिषद् बैठकबाटै निर्णय गरेर समयसीमा तोकी तत्काल गर्ने ११ काम अघि बढाउने छौं,” उहाँले भन्नुभयो ।

अध्यक्ष ओलीले भदौ २४ गतेको महाविनाश अप्रत्यासित घटना नभई नेपाल राष्ट्रको सार्वभौमसत्ता र अस्तित्वमाथिको योजनाबद्ध आक्रमण रहेको बताउनुभयो । उहाँले युवा भनेको आगो भएको उल्लेख गर्नुहुँदै अनुभव भनेको उज्यालो भएको बताउनु भयो । आगोलाई दिशा चाहिने र उज्यालोलाई ऊर्जा चाहिने भन्दै उहाँले दुवै मिलेर मात्र देशको भविष्य उज्ज्वल हुने जिकिर गर्नुभयो । अध्यक्ष ओलीले यो निर्वाचनलाई केवल पुस्तान्तरको विषय नभई ‘देश बनाउने र भत्काउने बीचको जनमत सङ्ग्रह’ भएको दाबी गर्नुभयो ।

उहाँले भन्नुभयो, ‘हाम्रो गन्तव्य स्पष्ट छ । समृद्ध नेपाल सुखी नेपाली । हाम्रो संकल्प स्पष्ट छ । सुशासन, विकास, समृद्धि र समानता। त्यसैका लागि घोषणापत्रमा हामीले गर्ने कामको सूची प्रस्तुत गरेका छौं । तत्काल गर्ने ११ काम, ५ आधारभुत घोषणा र समृद्धिका २५ स्तम्भलाई नीतिगत प्राथमिकतामा राखेका छौं । निर्वाचन पछि बन्ने सरकारको पहिलो मन्त्रिपरिषद् बैठक बाटै निर्णय गरेर समय सीमा तोकेर तत्काल गर्ने ११ काम अघि बढाउने छौं । मित्रहरु, फेरि अर्को भ्रम हाम्रा सामु चर्चा गरिँदैछ पुस्तान्तर र अन्तरपुस्ता द्वन्द्व ।’ उहाँले भन्नुभयो ।

ओलीले थप भन्नुभयो, ‘म भन्न चाहन्छु म आज स्पष्ट शब्दमा भन्न चाहन्छु यो देश पुस्ताहरु बीचको द्वन्द्वले बनेको होइन र द्वन्द्वले बन्दैन पनि चल्दैन पनि । देश बनाउनका लागि युवाको ऊर्जा चाहिन्छ । त्यो जोस, त्यो सपना, त्यो हिम्मत जसले जस्तो सुकै कठिन पहाड पनि चढ्न सक्छ । तर सँगसँगै अनुभवी पुस्ताको दृष्टि पनि चाहिन्छ । त्यो बुद्धि, त्यो संयम, त्यो मार्गदर्शन जसले युवा लर्खराउँदा भरोसा दिन्छ । युवा भनेको आगो हो। तर आगोलाई दिशा चाहिन्छ नत्र त्यही आगोले जलाउँछ । अनुभव भनेको उज्यालो हो । तर उज्यालोलाई पनि ऊर्जा चाहिन्छ नत्र उज्यालो आफै निभ्छ । आगो र उज्यालो दुवै मिलेर मात्र यो देशको भविष्य उज्ज्वल हुन्छ । हाम्रो रणनीति, हाम्रो राजनीति सबै पुस्तालाई जोड्ने, मिलाउने, साथ लिएर हिँड्ने हो। त्यसैले यो निर्वाचन पुस्तान्तरको होइन, देश बनाउने र भत्काउने बीचको जनमत सङ्ग्रह हो । यो निर्वाचन राष्ट्रघात र स्वाभिमान बीचको संघर्ष पनि हो। ।’